Ir á receita en castelán
Hoxe imos a darlle un toque oriental a unha receita con polbo.
Seguramente resulta atrevida, pero o resultado é realmente bo.
- 350 grs de polbo cocido
- 30 grs de prebe de soja
- 50 grs de aceite de sésamo
- 10 grs de xenxibre relado
- 1 dente de allo grande relado
- Ceboliño
- Wasabi (ó gusto)
- Pel relada de unha lima
- 1 lámina de masa follada
O outro día poñendo un pouco de orden, topeime cunha carpeta que estaba medio agochada e con síntomas de levar tempo sen que ninguén lle fixese caso.
Pois ben, nesta carpeta topei uns apuntes desta receita que, que pola data, é de hai uns cinco anos e que agora rematei por facer.
Fago un cambio nas proporcións, xa que na primeira que fixen o prebe de soja, enmascaraba totalmente o resto de aromas que se debían encontrar.
- Cortamos o polbo en rebandas coma si fose para un polbo a feira. Poñemos nun bol.
- Sobre o polbo, relamos o xenxibre (pelado) e o dente de allo. Tamén engadimos o ceboliño cortado e relamos a pel da lima.
- Engadimos o prebe de soja, o aceite de sésamo e o wasabi. Removemos ben e deixamos tapado na neveira.
- Pasados uns 30/45 minutos, sacamos da neveira e damos unhas voltas para que se mesture ben. Volvemos á neveira e recomendo sácalo con tempo suficiente, para que colla a temperatura ambiente.
- Mentres se marina, estiramos a masa follada e cortamos en porcións. Pintamos con ovo e levamos ó forno, prequecido a 200º, uns 20 minutos.
- Deixamos arrefriar a masa follada e, cos dedos, facemos uns buratos no centro de cada anaco de masa.
- Presentamos o polbo dentro da masa follada e regamos cun pouco de líquido da maceración.
Eu fixen a presentación ca masa follada, pero pode ser guarnición un arroz branco, unha ensalada de algas ou aquelo que vos guste.
Nota:
Como me interesan os vosos comentarios e me gustaría responder
directamente, vos agradecería que os comentarios ou consultas as fagades
por un destes dous camiños:
No correo: olivarela@hotmail.es
No Facebock: http://www.facebook.com/boproveito