Ir á receita en castelán
- 2 lombos de bacallau desalgado
- 3 patacas
- 8 pementos do Piquillo
- 2 allos
- 1 cullerada de azucre
- 1 ovo
- Aceite de oliva
- Sal
Como estamos nas portas da Semana Santa, os pratos que máis están presentes, son os de bacallau.
Este que vos traio, é un clásico: bacallau, patacas e pementos, pero imos a presentalo de un xeito máis vistoso.
É moi sinxelo, pero hai que facer tres preparacións distintas, que se poden facer con antelación a hora do xantar.
- Poñemos as patacas a cocer con pel (non debemos deixar que se pasen moito, pois imos a manipulalas despois). Cando estean en condicións de manipular, pelamos e cortamos en rodelas de medio centímetro aprox. Reservamos.
- Cubrimos o fondo dunha tixola con aceite e botamos os allos fileteados. Cando comencen a tomar cor, baixamos o lume e incorporamos os pementos. Deixamos que se vaian confeitando ca cullerada de azucre. Deixamos facer uns cinco minutos e reservamos.
- Nun cazo, cun chorreón xeneroso de aceite, poñemos a facer o bacallau. Tedes que ir coidando a temperatura do aceite, non o queremos fritir, queremos que se nos faga moi lento. Colocamos o bacallau no cazo ca pel para abaixo, movemos para que non se nos pegue. Deixamos que se faga uns catro minutos dando movementos circulares ó cazo (veredes como vai soltando a xelatina). Damos a volta, con coidado xa que se irá desconchando e deixamos facer outros catro minutos. Retiramos e reservamos.
- Como na cociña non podemos desperdiciar nada, co aceite do bacallau imos a darlle unha fritura as rodelas de patacas reservadas. Reservamos.
- Cos allos e o aceite dos pementos imos a facer a maionesa, incorporaremos máis aceite se foxe necesario. Vai a saír unha maionesa moi suave e tirando a doce. En definitiva, distinta.
- Para montar o prato, collemos un aro e poñemos un fondo de patacas, sobre estas uns pementos de piquillo e rematamos con lascas do bacallau reservado. Cubrimos cunha capa de maionesa.
- Co forno prequecido a 200º, introducimos a preparación e retiramos do forno, cando a maionesa toma unha cor de barra de pan.
Xa temos o bacallau con patacas e pementos listo para levar a nosa mesa e disfrutar dos sabores.
Nota:
Como me interesan os vosos comentarios e me gustaría responder
directamente, vos agradecería que os comentarios ou consultas as fagades
por un destes dous camiños:
No correo: olivarela@hotmail.es
No Facebock: http://www.facebook.com/boproveito