Ir al contenido principal

Solombo de porco con prebe e mazá

Ir á receita en castelán

Como non soamente de venres de Coresma vive o home e a muller, hoxe imos con carne.
Con carne de porco e máis concreto con solombo, unha peza que nos da moito xogo nas nosas cociñas.
Prepararemos esta carne cun prebe de Pedro Ximénez e daremos o contrapunto de acidez, cunha guarnición de mazá Reineta caramelizada. Ben sabido é o ben que ligan as froitas ca carne de porco.
Para un solombo de uns 600/700 grs., precisaremos os seguintes ingredientes:

1 solombo de porco
1 cebola
2 mazás Reineta
4 culleradas de azucre
2 culleriñas de manteiga
150 ml de Pedro Ximénez
50 ml de auga
Aceite
Sal e pementa

Limpamos o solombo de graxas e selamos, a peza enteira, nunha tixola cun par de culleradas de aceite a lume forte. O solombo deberá quedar ben dourado todo el polo exterior, máis o interior debe de quedar cru. Reservamos.
Pelamos e picamos a cebola, para pochala, a lume brando, no mesmo aceite de selar o solombo.
Mentres pelamos e descorazonamos as mazas, que cortaremos en gallos.
Noutra tixola, con dúas cullerinas de manteiga e con catro culleradas de azucre, caramelizamos as mazás dándolle voltas ata que collan unha cor dourada. Neste momento engadimos os 50 ml de auga e deixamos ata que o lume evapore, practicamente, todo o líquido.
Cando a cebola que deixamos pochando estea no seu punto, engadimos o Pedro Ximénez e remexemos ata facer o prebe.
Cortamos o solombo en tacos, salgamos e engadimos ó prebe feito. Para min este é o punto crítico deste prato, deixaremos facer a carne un par de minutos. Se nos pasamos de tempo, corremos o risco de presentar unha carne totalmente seca.
Presentamos na mesa ben quente, acompañando ca guarnición das mazás caramelizadas.
Como xa comentei, o contrapunto ácido da mazá, liga perfectamente co sabor dulzón da carne co prebe.
Penso que disfrutaredes moito con este prato.


Nota: Como me interesan os vosos comentarios e me gustaría responder directamente, vos agradecería que os comentarios ou consultas as fagades por un destes dous camiños:
No correo:     olivarela@hotmail.es